meines Vaters. Diss Lanndt verhert habenn. Wann sein
grosmůtickait erweckt wider ÿn die Fůrstenn vnd konige ÿn zůkriegn.
Aber sein kůnhaidt erwarb das sein nam allen vmbligendenn
erschrecklich was. Wann nůn der Almechtig mir hat
gegebenn. rwe vnnd stillickait der zeit. also das alle sachen in fried
steenn. důrch got allein. Derhalbenn ich in seÿner lieb vmb ewers
hails willenn verlas alle mein Lanndt. weÿp vnd kindt můtter vnd
brůder. Darzů alle mein freůndt. vnd opfferr mich williglich in
dem namen Ihesů wider die haidenn. vnd vnglewbigenn vber Mehr
zůzciehenn Deshalb ich eůch alle bit vnnd erman. das ir den
armen lewthen in gleicher gerechtickeit wellet fůr sein. Aůff
das ÿr vnnd sie in gerechtickait erfůndenn mocht werden. Vnd bitet
Got. ab es ÿm gefellig ist. mich eůch widerzůschickenn. Welchs
almechtigen gnaden ich eůch vnd mich trewlichen befÿll. Vnd
als er diss geredt hett. schÿedt er vonn dannen. mit grosser clag vnd
weÿnenn aller vmbsteenden. Vnnd zcog vonn einem Closterr zů dem
andern den Můnchen vnd Nonnenn sich andechtigs gebets zůbefeln.
vnd den Segen vonn ÿn zůentpfaen. Also
kam er aůch gein Rainhartsborn die brůder zůgesegen. Vnd als die
Brůder nach der Complett. nach gewonhait heraůs giengn. dass
weÿhwasser zůnemen. stůndt der Fůrst beÿ dem Priester der da
sprenget. vnd nam sie besůnderlich Jůng vnnd alt. ainen nach
dem andernn. in sein arm grůsset die vnd gab ÿn den kůss des frids.
Důrch dise grosse gůtickait wůrdenn sie beweget alle zůweÿnenn. Da
diss der Fůrst sah. weÿnet er aůch. Da hett mann manchen alten
gesehen. Als die kinder zeher vergiessenn. Beÿ welchen
der Fůrst ÿr zůkůnfftig laÿdt verkůndet vnnd sprach. So ich
hinweg kům. werdenn wider eůch aůfsteen reÿssende wolffe.
die eůch vnnd ewer gůter zůstrewen werden. Vnd so ir vonn ÿn
gepeinigt werdet. werd ir erst erkennen was ir an mir verlorn habt
einen vnwiderbrenglichenn beschÿrmer vnd hanthaber. Doch
wirt eůch Got eingedechtig meiner wallfart. Eůch in
beqůemer zeit důrch die glidder seiner Barmhertzickait gnediglichenn
daheÿm sůchenn. Als er diss geredt hett. gesegent
er sie vnnd gieng hinweg. Da was ain grosse clag der
trawrichen monchen. die ÿm aůs gůtiger begir mit weÿnenden
awgen nachfolgten Im die benedeÿůng gaben. in ÿrem gaÿst.
vermeynendt das der Frům Lanntgraff aůssenbleÿbenn wůrd.