gemacht aůff ein mawll. vnd setztenn Daraůff ein gůldes krewtz mit edelgestein
getzirt. Als cristenliche Ritterr. vnd ÿres herren getrew liebhaber
vnnd die ganntz Raÿs aůs wo sie benachtenn trůgen sie das gebeÿn In die
kirchenn liessen darbeÿ singen Vigilien vnd bethen. Aůch des morgens
messe singenn vnd lesen. theten ÿr opffer vnd zcogenn hinweg. Was
aber die kirch ain Bischofflich stifft. ader Closter liessen sie darÿnnen den
Tebicht der vber den schreÿn gedeckt was vonn reůerentz wegen. vnd zů
hail des toten selen ein solch beÿgrafft an Gotes dinst beraiteten die
getrewenn Brůder yrem wirdigenn vnd hailigenn Fůrstn.

Jnn mitler zeit kamen die mere von dem abgang des hailigen lantgraůen
Lůdwigs zů důringn Darůmb meinten etliche frůmme menschenn.
der hailigenn Frawen Elÿsabet důrch des Fůrsten můter zůchtiglich zů
offenbarnn. wann sie gedachten. es kůnt der Fůrstÿnn nit lang verborgen
bleÿbenn. Also nam des verstorben Fůrsten můter etliche Erbare Frawen
zů ÿr. vnnd kam gein Wartberg. Da sie vonn der hailigen Elisabet
wirdiglich entpfangen wart. Als sie aber beÿeinander sassen. Sprach
die můter des Fůrstn. Liebe tochter seÿt eines starckenn gemůts.