Vnnd als sie lang vonn Jhemmerlichen schmertzen nit redenn kůnt, fieng sie
wider ein hertz, vnd Sprach. Ich Sag dir danck dů ewiger got. Wann
dů hast erfůllet mein Jnnigs begern. mit disem aÿnigen gesicht. dess
gebeins meines allerlibsten gemahels meine betrůbte sele damit zůtrosten. Mich
hat nÿe gerawenn das ich dir ÿn. von ÿm selbst důrch mich zůhilff dem hailigen
landt geschickt hab. Wiewol ich ÿn von gantzem hertzenn lieb hett. Dů waist
das ich sein begirlich gegenwertickeit aller welt gůt hett. fůrgesetzt. so
mir yn dein gutickait vergent hett. Aber nůn beůelh ich mich vnd ÿn. in den
willen deiner gotlichen ordnůng. vnd wolt ÿn nicht ab ich mocht mit
ainem aÿnigen har meÿnes hewbts wider dein wolgefallen zů dem leben bringn.
Als sie dis geredt hett. wischet sie ÿr awgen vnd sweig. gieng aůs der
kirchen vnd setzt sich in die Capellen dabeÿ gelegen. vnd bat die edeln Pÿlgram
vonn Důringn zů ÿr zukůmmen. Als sie kamen stůndt die hailige Elisabet aůff
demůtiglichenn. vnd entphieng ein itzlichen in sůnderheit. bittend sich zůsetzen
Also claget sie ÿn das vbell vnd vnrecht ÿres mans brůder Lantgraff Hainrichs
zů Důringn an ÿr begangen. Darzů kam der Bischoff der da ratschlagt mit ÿn
vmb ÿr morgen gab. Also verhiessen sie ÿr als ÿrer Landsfůrstÿn, vnd dem Bischoff.
alles das da billich erlich. vnd recht wer zůůerhelffen. Als nůn die beÿgrafft
gescheen was. vnd sie den segen von dem Bischoff entpfangen hetten. zcogen sie
von dannen mit dem haÿlthůmb, vnd mit ÿn die hailige. Elisabet.

Als diss geschreÿ in das Landt zů Důringn kam. hůb sich ein New clag der