mit ÿrer můter noch dreÿ tag in dem Closterr. Darzů die Pilgram mit der hailign
Elisabet, vnnd als man die kost bezalt hett. gedachten die Brůder ÿres gelůbds als edle
Pilgramenn vnd Cristliche Ritter zůstůndt erwelten sie Schenck Růdolff vonn
Varila zů ainem vorsprechen. Wann er redlich vernůfftig, vnnd kůn was.
vnd giengen fůr den Lanntgraůen Hainrich vnd vmbringtn ÿn. Also hůb
Schenck Rudolff also anzůreden.

Důrchleůchter Fůrst. Mein freůnde vnnd ewer vnterthanen hie vmbsteendt
habenn mich geheissenn zůreden einfach. die billicher einem ÿtzlichen Cristen
menschen zuůerschweigen were Wir haben vernůmmen
an vnnser widerfarth. in Baÿrn Francken vnnd Důringn. Das ein
vbeltat důrch eůch bescheen seÿ. Da důrch vnnser gemůt ser geengstet ist
vnd vnnser angesicht vor scham vnnd rote diser vbeltat ser belaÿdigt wirt.
das in aines solchen Fůrsten hertzenn so graůsam vntůgent. sal befůndenn
werden. Welcher ist ÿe vnnter allen cristlichenn Fůrsten
gewesen der seines brůders weib. mit ÿrenn klaÿnen kindern also vnredlich
wider das gesetz Gotes der natůr. vnd wider das geschriben recht hett aůsgetrÿbenn
Eÿa ir Jůnger Fůrst wer hat eůch disen rath gegebenn. das aůch
den haÿdenn lesterlich zů Horenn were. Die ÿr solt ein frembde witwe geert
vnnd beschirmet haben. Aber was sprich ich ein frembde, Ewers brůders
weÿb. vnd eÿnes konigs tochterr habt ÿr mit ÿrn kindern ewern vettern also.
Jhemmerlichenn aůsgeslossenn. Sie zůbeherbigenn verboten. vnd als ein betlerÿn
aůs dem Lanndt vertriebenn. hat diss ewer brůder vmb eůch verdient. hat
das eůch ewer getrewer Vater gelernt. Ist das brůderlich lieb. Warlich
es ist aůch keÿnes redlichen frůmmen Fůrsten art vnd gewonhait. Wann
ainem ÿeden Fůrsten vonn recht gebůrt. witwen vnd weÿsen beschůtzen vnd
zůbeschirmenn Das er diss geredt hett
swig der Fůrst. naiget sein hawbt vnnd důrfft vor scham nÿmants ansehen
zů dem Schenck Rüdolff Sprach. Herr was habt ir geforcht. in diser frembden
Frawen. die in dissen Landenn frembd ist. wider freůndt noch mogenn hat.
Ob aůch gleich alle ewer Sloss yn Irer hanndt weren gewesen. Warlich
glawbt vnns wir sein aůs dieser that allen vnsern nachbarn zů spot worden.
Aůch leÿder wievil gespots wirt vnns noch das von vnsern feÿnden fůrgeworffen.
Ach wee wie vbell habt ÿr gethan. Jch [lies: Jhr] habt an zweiůel got
damit erzcornet. Eůch selbst vnachtbar gemacht. Ewer Landt vnd lewth.
in verachtůng des vorigenn namens beÿ konigen vnd Fůrsten in eÿn sprichwort
vnd Fabell gesetzt. Vnnd nembt war Eůch ist zůforchten die straff Gotess.
vnd allem ewerm Folck. Es seÿ dann das ÿr dÿse vnschůldige vnd hailige
witwe an mittel befridet. vnd eůch mit ÿr. vnd mit ÿrn kindern versůnet.
Wann got ein ernster streffer ist der vbeltath. Vnd pflegt das lang vbersehen
vnd gedůldenn. mit beschwerůng der peÿn zuůergleichen.

Diser freÿenn redt des Schencken Rudolffs gegen dem Fůrsten verwůndertn
sich alle vmbsteer vnnd zůhorerr Als aber der Fůrst sich selbst
vnnd sein sůndt bedacht. raweth ÿn die bose that. fieng an bitterlich
zů weÿnen. vnd also das er lange zeit kein wort redenn mocht.