Konig Ditterich mer vonn Francken. dann von Franckraich ertzelte grawsamkait
vnnd vntrew der Důringen zůstraffen. zcog zůsambt seinem brůderr
Clothari. vnd seinem Sůn Theodobert. mit heer in das Landt zů Důringen.
sich vnnd sein Lanntschafft zůrechenn. Als nůn die Důring
der Franckenn ankůnfft gewar wůrdenn. ertzaigtenn sie den Francken
disenn betrieg. Sie machtenn vil grabenn aůff dem feldt. do der streÿt
solt gescheenn. vnnd bedeckten sie oben mit grůnenn rasen. Als
nůn die Francken im streÿt darůber rÿtenn. fieln vil pferd in die graben
Da aber die Franckenn den betrieg mercktenn. hetten sie achtůng daraůff
vnnd nachdem die Francken In dem selbigen streÿt das glůck hettenn.
erschlůgen sie die Důringen grosser antzal. Vnnd brachten sie mit sambt
Irem konig in die flůcht.