kam er zů dem Lanntgraůen vnnd Sprach. Herr der Bischoff strafft
vnsern Apt mit rwtenn. in dem Crewtzgang Derhalbenn der
Lanntgraff beweget. in den Creůtzgang eÿlet. vnnd als er den Apt mit der
rwtenn vnnd licht sah. sprang er vnnter den hawffen. Ergreiff den
Bischoff beÿ den harnn. warff ÿn wider die erdenn. Den er aůch mit
gezcogener were důrch stochenn hett. wer er nit von den vmbsteenden gehindert
wordenn. zústůndt eÿlet der Lanntgraff aůs der Stat. Versammelt ein
heer. vnd gewan das Schloss Densbůrg vnd zůbrach das Inn grůndt.

Darnach belegt diser Lanntgraff die Stat Fridislarr. vnnd als er gedacht
vonn des Stiffts wegenn der Stat zuschonenn vnd abzůziehen. Da diss
sahenn die einwoner man vnnd weib. lieffen sie aůff die mawrnn
deckten aůff ÿr hindern vnd schame ÿn zulestern vnnd zůůerspottenn.
Also keret er wider zůndet die Stat an. darInnen etlich tawsent
menschenn mit sambt dem Monsterr vnd den kirchen verbrantenn.