Vonn diser gebar er zwenn Sůn. Albrecht. den Lantgraůenn In
Důringn. vnnd Dittrich Marggraúenn vonn Landsperg den feÿsten.
Benante sein Erste Fraw starb ÿm nach Cristi gebůrt zwelffhůndert.
vnnd Im DreÿvnndVirtzigstn. vnd wart zů der alden zelle begrabenn.

Darnach nam er zů seinem eelichenn gemahell Frawenn Agnes.
des konigs Ottocar vonn Behem tochterr.

Dise verschiedt an erbenn Nach Cristi gebůrt zwelffhůndert vnd Im
Achtvnndsechtzigstenn Jhar. vnd kůrtz vor ÿrem tot erschÿn ÿr der
Engell Im schlaff vnd raicht ÿr ain getranck in ainem gůlden kopff.
darůon zutrinckenn. Vnnd als sie das gekostet hett. saget
sie O herr wie bitter ist diser tranck. Daraůff der Engell antworth.
Dein tranck wirt bitter sein. Aber Got wirt dich nicht verlassenn.
Also starb sie nit Lang darnach. vnd wart aůch zů der aldenn zelle begraben.

Derhalbenn nam er ain annder weÿb Frawenn. Elisabet. von Maltitz
ein edle Frawenn. Vonn diser hett er ainen Sůn.
Marggraff Fridrich vonn dresden. der da Clemme genant wartt.