Da diser Lanntgraff Hainrich zů seinem alder kůmmen was. vnnd mercket
das seines lebens nicht vil grosser fristůng vnd erlengerůng mer
wer tailt er sein Lanndt vnnter sein Sůn. zwÿtracht zwischen ÿn nach
seinem tot damit hinzůlegenn. vnd zůbewaren. Vnd gab beÿ seinem leben.
seinem Sůn Lanntgraff Albrecht als dem Eldisten das Lantgraffthůmb
zú Důringn. Seinem nechstenn Sůn nach benantm Dittrich die Marck
zú Lawsatz, vnnd Im OsterLandt neben der herschafft zů Groÿtzk
die er ÿm aůch gab. Vnd dem Iůngstn Sůn Fridrich gab
er Dresdenn. Haÿnn. vnnd vil annder Slosser mer vnnd Stete.
Darnach als dieser Lanntgraff Hainrich sein testament, vnnd alle
andere sachenn bestelt hett. starb er Nach Cristi gebůrt zwelffhůndert
vnd Im AchtvndFůnfftzigsten Jhar. Vnd wart beÿ seinem Vater Im loblichen
Closter zů der Aldenn zcelle Cistercier Ordens Inn Meÿssenn begrabenn.