Nach dem tode des hochbenants Romischenn konigs vnnd Lanntgraůenn
zů Důringn vnnd hessenn. triben Hertwick vonn Horsilgaw. Hanns
hatze. vnd vil andere důrstige verwegen Lewth mit ÿrn anhengernn
vnnd helffern vmb Eÿsennach in den grúnden. vÿh vnnd alles das sie
fanden. weg. vnd teten den lewthen vbergrossen schadenn. Solchs thet
den frůmmen Bůrgern zú Eÿsennach ser wee. vnnd schickten eÿlend ÿr
botschafft zů den vonn Crewtzberg als zů ÿrnn nachbarnn sie trewlich
bitende. sie wolten den rewbern den rawb abJagenn. Dergleichenn
schicktn sie aůch zů dem Hawbtman zů Tenneberg ein boten. Damit sie
ÿe nicht den rawb důrch das horseltall mochten ganntz hinweg.
bringenn Also gebot der Ambtman zů Tenneberg angesicht des
brifs seinen Ambtsverwanten aůff Vnd versammelt. derselben in der eÿl
Soůil er mocht Vnd zcog also mit solchem seinem Folck.