Auch starb Nach Cristi gebůrt zwelffhůndert vnd Im Achtvnddreisigstenn
Jhar Graff Herman vonn Orlamůndt ein ser mechtiger herr Welcher
vom Důringischenn Adell zům tail von seiner mildickait wegenn geert.
zům tail von wegen seiner gewalt. geforcht wart. Aůs welchem fall
vnd anderm gar manchfeltige vnfell vnnd enporůng teglich gemert
wůrden. Es kam aůch dahin das nachdem die Fůrsten vnnd herren In
Důringenn Verstorbenn warn. das eÿn Yeder Edelman eÿn aigen Sloss
habenn wolt. Vnd sie hetten aůch in solcher enporůng von nÿmants kaÿn
einrede nach hinderůng. Darůmb bawetenn die vonn Wangenhaÿm das
Sloss kalinberg Die vonn Tůllestetenn das Sloss Steinsfort. Die vonn Lůpenitz
leůchtewaldt. Die vonn Stockhawsenn Aldenberg beÿ Vÿschbach. Die von
Kobinsteten Scharffenberg. Die Panerherren vonn Franckensteÿn