Waldenborck. Hermann Strawtz Ritter Straůssmaw. vnnd der ganntz
Adell an der Werre bawet Brandenfels. vnd andere vil Slosser Welche
in solchem vnstandt vnd zwÿtracht aůch gebaweth wordenn. Dises
vortails namen die vonn Erffůrdt aůch acht. vnd was sie kůnten dem
Fůrstenthůmb abbrechenn. vnd einnemen das theten sie mit vleÿs.
Derhalbenn es die zeit in Důringn vnnd Hessen ser vbell vnd vnglucklich
stůndt.

Aus soůil vnnd so grossenn vrsachen der maist tail der
Graůenn vnnd herrenn in Důringn vil benantenn Marggraůen Hainrich
vonn Meÿssen. den schwester Sůn des Romischen konig Hainrichs
vnd letzten Lantgraůenn in Důringn. Als eÿnen rechtenn erben
zů Ainem Fůrstenn vnd herrenn einforderten.