Etlich aůff der anndern saiten vnd Nemlich die hessenn wolten hertzog
Hainrich vonn Brabant zů ainem herren. Als einen Sůn Sophie Sant
Elisabet tochterr Welchen die hessenn vermeinten den
nechstn vnd billichsten erben sein zů Důringenn vnnd Hessenn.

Darnach in solchem zwÿtracht vertrůgenn sich baide tail also das mer
benanter Marggraff Hainrich Lomar von Meÿssen solt důringen
in aÿnes vorwesers vnd vormůnds namen. ÿnnen haben. So Lang bis
es von dem Raich erkant wůrd, welcher tail das Landt billicher erbeth.

Zů denselben zeitn was das Romisch Raich vil Jar an einen Konig.
Vnd diser Marggraff Hainrich die vonn Erffurdt zů mer malh.
manet. dem Landt zů Důringn was sie darůon getzogenn hettenn.
wider zůantworten. vnd als die vonn Erffůrdt solchs nicht thůn woltn.
blegt [lies: belegt] er ÿn ÿr Stat. vnd thet ÿn soůil schadens. das sie entlich dem Landt,
zů Důringn alle eingenůmmen gůter wider gebenn můsten.