befandt. das ÿr vil weniger gehaltenn dann geredt wart, wůrd sie mit
grossem zornn bewegt. vnnd zcog Inn hessenn. Dann nÿmants
hielts mit ÿr dann die vonn Eÿsennach. vnd die herren von Mittelsteÿnn
vnd Franckensteÿn. Jm Lanndt zů hessen bevlis sie [lies: die] hertzogÿn.
mit hůlff der vonn Eÿsennach. vnd der herren vonn Mittelsteÿn
vnnd Franckensteÿn den offtbenanten Marggraůenn zůkriegenn.

Aber der Marggraff hett das Schloss Wartberg Innen. das er nebenn
natůrlicher befestůng der gegent wol gespeÿst. vnnd mit geschůtz vnd
gůten verstendigen Lewthen wol versehenn hett. Derhalben
die hertzogÿn vonn Brabant wenig an dem ort. nůtzes endet.

Demnach beschlos sie ein bůndt zůmachen mit dem hertzogen Albrecht
vonn Braůnschweig eÿnem vberstreitbarn vnd Sÿghafftigen herren,
der da newlich daůor den ErtzBischoff vonn Meintz Gerhardenn
mit vil Graůen Herren, vnd Edeln gefangenn Hett. In hoffnůng ÿr
gerechtickait důrch desselben hůlff zůerlangenn.

Daraůff sie aůch aůs rath der ÿren zů dem gedachtenn Hertzogenn
zcog. Da aůch der bůndt also gemacht wart. das hertzog Ludwig von
Brabant Frawenn Sophie Sůn das kindt vonn Hessen genant. solt
nemen des hertzogen zů Braůnswig tochterr. zů der Ee. Vnd disenn
zweÿen kindern soltenn baÿde Lanndt Důringn vnnd Hessenn
gehorsam vnnd vnterthenig sein.