Jnn mitler zeit Nach Cristi gebůrt zwelffhundert vnd Im Ainvnndsechtzigstenn
Jhar beslossenn die auff Wartberg mit eÿnander ein hertziglich.
ÿn von der nehe wegenn verdechtig vnnd hinderlich. wie sie
das zůwegenn mochten bingen [lies: bringen] zůgrůndt zuuerterbenn. Daraůff sie
heÿmlich steigleitern machten. vnd was von noten vnnd Dienlich darzů
war. Vnnd ain mal fern In die nacht da ein grosser windt vnd regen also
strebten. Das man gar schwerlichen sehen mocht. kamen die von Wartberg.
heymlich vnd schweigendt fůr den Mittelsteÿn. Da der Berg am niderstn
war. vnd am wenigsten wechter stůndenn vnd warten. leÿnten die leitern
an. vnd nachdem die herrenn Daraůff schlieffenn gewanen sie das Sloss
fiengen die herrenn vnd verbrantn es zů grůndt. Wiewol nicht
ÿederman gefallens daran geschah. Wann nechst Wartberg was kaÿn Fester
Slos in Důringn. vnd alles das die aůs dem Sloss Wartberg aůff dem
Mittelsteÿn fůnden. namen sie mit ÿn hinweg, vnd fůrten das aůf Wartberg.