Wartberg vnnd Eÿsennach das den Marggraůen hett můgen abweÿsen vonn
der Stat. nam der Marggraff alle sachen gůtlicher vnd senfftmůtiger
gegen der Stat fůr, dann er vormals gethan hett. Damit er vil gůnsts vnd
zůfals beÿ den bůrgern zů Eÿsennach erlangt. Aůch ym entlich das gemeÿn
Folck zů Eÿsennach von wegen der vil vnd manchfeltigs erliden scheden
zůfiell. Derhalben vnnd daraůff er mit hůlff solcher seiner gúnstigern
in der nacht des abents der Bekerůng Sannt Pawls zů Eÿsennach hinter dem
Parfůsser closter. die leittern lies an leÿnen vnnd eÿn steÿgenn.
Darzů die wechter willig warn. an alle gegenwer. vnd Sprachenn.
Steiget hereÿn Inn Gotes namen. Dann was wollen wir vnns so,
Lange zeit lassen betrůbenn. mit soůil vbeln vnd schedenn. Also
gewan der Marggraff Eÿsennach vnd lies etliche Bůrger die ÿn mit
worten vnd werckenn belaidigt hetten. enthawbten. Ainen der ÿm
ser wider war gewest. lies er in eynem bleÿder aůs Wartperg in die
Stat Eÿsennach werffen. Welcher an vnterlas schreÿ. Dů bist kaÿn rechter
erb. Die aber in der newen obenvermelten besetzůng zů Eÿsennach aůfgericht
verblÿben warn. als sie sahenn das sie wider hůlff nach trost, Ader
rettůng hettenn. zůntdeten sie dieselben an vnnd flohenn darůon.

Da Eÿsennach vonn dem Marggraůen wie erst gedacht ist gewonnen was.