Zcog Hertzog Albrecht vonn Braünsweig mit grossem heer in Důringn.
In maÿnůng solchen schaden mit grossem schaden zůrechen. vnd thet
abwesens des Marggraůen vil schadens. Wiewol er sich fůr kaÿnn Stat
nach Sloss nÿe leget. Aůch nichts gewan vnd mit gewalt erobbert.

Als der hertzog vonn Braúnsweig sah das ÿm kain wider stant geschah,
zcog er fůrt gegenn dem OsterLanndt, vnd thet ser vil schadens mit brennen
vnnd Rawben. Beůor in den zweÿenn Bistůmben Naůmbůrg vnd
Mersbůrg. die er wol besetzet. Dann er wůst das Marggraff
Hainrich Inn Behemen was. Da er sich vmb Folck vmbthet seinen
feÿndenn dester bass zů widersteenn.