Der Hertzog versehe sich keiner gegenwer, vnnd wůste das ÿr Vater
aússenn wer. hulff vnd Folck zůerlangenn. So besorget er sich keÿner
widerwertickait von ÿn. vnd vil weniger ÿrer zůkůnfft. vnd das
man ÿn wůrd vberfallenn. Sundern nem vnbesorgt was er woll vnd
beschedigt ÿr Lanndt vnnd Lewth nach allem seinem gefallenn.

Aůff vorberůrten trostlichen rath Schenckenn Rudolffs von Varÿla
wurden die Jůnge Fůrstn ser frolich vnnd zuůor das er ÿn die hoffnůng
hett eingeredt mit gotlicher hulff den Sÿg zuerlangen. Darůmb wart
nit gefeÿert, vnd die Marggraůen brachtenn Dreÿhůndert pferd
zůsammen. Mit welchen sie heimlichenn mit sambt Schenckenn
Rudolff vonn Varÿla fern In die nacht aůs Leiptzick zcogenn. Vnd