vonn Bercka, der ÿn schwerlich erzcornet hett. zcog mit sambt
seinem brůder dem Lantgraůen Dittrich von Landtsberg Vor ÿn. vnd
gewan ÿm Bercka das Sloss ab. Dess sich die andern Graůenn
vnd Erbarn lewth in dem Landt zů Důringn gemeiniglich annamen. vnd
satzten sich wider Lantgraff Albrecht. vnd sprachen. sie hettenn ein
verbůntnÿs vntereinander beslossen. das ÿr keÿner wider den andern.
kriegen solt Sůndern wo sich zweÿtracht begebe. vnter ÿn. der solt er macht
haben sie zůrichten vnd weren. Vnd wolten alle ÿr sachen vnd recht.
beÿ ÿn lassen bleibn. Darzů sie sich vor ÿm hetten mit dem aÿdt verbůndn.
Nůn grÿff er sie selber an. vnd brach den frid an ÿn da er sie zůhaldn solt.
Als der Lantgraff dise rede vernůmmen hett. vnd merckt Das sie alle wider
ÿn sein wolten. gab er dem vorbenantn Graůen Bercka wieder
Daůon in Důringenn ein gůter vnd steter frid wart.

Nit lang Darnach verlies dieser Lantgraff Albrecht den angefangen
weg der tůgent, vnd wart mit torichter vnzůchtiger lieb in aine seines