Vierzehendenn Jhar sey der Erst Cristennlich konig vonn Franckraich
Clodoneůs gestorbenn vnnd hab vier Sůn gelassenn. Clodomir. Hilprecht.
Lothar vnnd Dittrich. Vnnd wiewol Dittrich nicht seÿ eelich gebornn.
gewest. dennoch hab er vonn wegen seiner weÿshait. sterck. vnd tůgent
gleichen tail mit seinen brůdern entpfangen. Das Lanndt OsterFranckraich
vnnd hab sein koniglichenn Stůl in die Stat Metz gesetzt. Darnach
hab er konig hermenfrid von Důringen zů seiner weÿhe vnd einfůrůng
geladenn. Inn maÿnůng ein gebůntnÿs mit ÿm zůmachenn. Als das
konig hermenfrids weÿb. konig Dittrichs Stifswesterr obenbenant sah. wart
sie betrůbt. vnd schickt nach dem Ritterr Iring. vnd bat ÿn
den konig dahin zůweÿsenn. das er keÿn verbůntnÿs. mit Konig Dittrich
machet. Dann er wer ein knecht. vnnd ÿm gebůrt das Raich mer
dann dem Ditrichenn. In dem war konig hermenfrid Im Rath.
vnd beratslagt ab er den frid solt vonn konig Dittrich annemen. wie
ÿm aůch geraten wart Angesehenn das sie nicht zů gleich von den
Francken vnnd Sachssen kůnten krieg leÿdenn. Aber darnach machet
der Ritter die sach so wendig. das konig hermenfrid. Konig
Dittrich dise antwort enbot. Vnser Freůntschafft
vnnd mogenschafft verlawgen wir nicht. Aber wir kůnnen vnns
nicht verwůndern. das dein herr wil das Reich annemen. ee er freÿ
wirt. vnnd weÿl er vneelich gebornn ist. Darůmb můgen
wir keÿn frid mit ÿm haben. Solcher antwort erschrack konig
Dittrichs bot. vnnd saget. Mein kopff wolt ich lieber verlierenn
dann dise ewer anntwort sagen. Dann ich weis das sie wirt
mit grossem blůtvergiessenn der Franckenn vnd Důringen abgewaschen
werden. Als nůn konig Dittrich. konig hermenfrids antwort.
gehort hett. Sagt er mit Lachendem můndt. Wir můssen zů konig
hermenfrids dinst eÿlen. Damit wir vnnser leben. weÿl wir nicht
freÿ seint. nicht verliern. Vnnd versammelt baldt ein heer vnd
zcog in Důringen. Vnd nachdem er konig hermenfrid vor Ronnenberg
fandt. strÿtenn sie zwen tag miteÿnander mit zweiůel. Am
drittenn tag flogenn die Důring. den konig Dittrich nachfolget. Vnnd
erslůg ir vil tawsent beÿ einem dorff genant Arům.