Vonn der gewan er Dreÿ Sůn. Fridrich. Titzman. vnd. hainrich.
alle ane Lanndt genant. Darůmb das sie ÿr Vater. wiewol wider
Got vnnd recht vermeint zůenterben. Daraůff sie aůch můstenn
des maistenn tails ÿrer Lanndt etlich zeit mangelnn.

Het aůch mit ÿr ain tochter. Agnes. Darnach hertzogÿn zů Braůnsweig.
des hertzogenn Hainrichs von Braůnsweig des wůnderlichen
genant gemahell. Der benant Romischer
Kaÿser Fridrich gab seiner tochter mit Pleÿssenn. Welch
herschafft daůor des Graůen Rabbodon war gewest.

Dise herrschafft hett gekaůfft der Erst Kaÿser Fridrich. mit sambt
den Slossernn vnd Steten Leÿsnick vnnd Colditz vmb FůnffHůndert
marck silbers. Vnd kam darnach wie gedacht ist an Lanntgraff
Albrecht vonn Důringn. Jm gefiel aůch zů seinem
tail vnnter seinen brůdernn das Lanntgraffthůmb In
Důringn vnnd die Pfaltz Inn Sachssenn.

Darnach nam er sein zů helderin die schon kůngůndt oder Kůnn
von Eÿsenberg. vnd erlangt ein Sůn mit ÿr gnant Albrecht Apetz.

Zům Drittenn nam er Frawen. Adelhait. vonn Castell gebornn
eins Graůen Vonn Arnshawg nachgelassene witwe.