Darnach richtet diser Fůrst sein reichthůmb, grosmůtickait vnd mÿlde
zůbeweÿsenn vor der koniglichenn Stat Northawsenn einen forst aůff
mit Bawmen. gar schon vnnd kostlich getzirt. Dahin er nach form des
vbermechtigen konigs Assůeri, alle Teutschen Fůrstenn Graůen. Freÿen.
Ritter vnd knecht lůt. eÿnen Thornÿr ader Stechhoff daselbst zuhalten.
Da het er aúch aůffgerichtet ein vberschonenn bawm von goldt vnnd
silber gemacht. einer mercklichenn hohe. mit vil bletternn getzirt,
Vnd welcher Graůe. Ritter. ader herr in demselben Stechen seinen
spies besitzendt zůrandt. verdint ein silbern blat. von disem bawm
Welcher aber seinen gesellen ledig abrent, verdint ein gůldens blat.