Darnach beschlos konig Ditterich aůff den rath. so ÿm vonn seinerr
getrewen vnd verstendigen diener eynem gegeben wart. aůs dem Landt
zů Důringen nicht zůziehen. Er het dann den konig hermenfrid bas
vberwůndenn. Daraůff schicket konig dittrich zů den
Sachssenn vmb ein Folck. die ÿm neůn Fůrsten schickten. vnd mit
einem itzlichen Fůrsten taůsent wolgerůste menner. Als nůn die
Sachssen zů konig Ditterich kůmmen warn. nam er sie gar erlichen
an. mit erbietůng wenn sie konig hermenfrid fingen ader erslůgen.
ÿn das Lanndt zů Důringenn bis zům zůsammen fliessen der Sal
vnnd vnstrůt zů ewigem erbeÿgen zůgebenn.