weÿnenden awgen gnad begerendt. Also erschrack die Fraw, vnnd
fůr aůff, fragend was er vbels gethan hett. Vnd er antwort. Nichts.
Sůnder ich werd betzwůngn vbels zuthůn. Also gedacht sie ÿn zů vil
getrůncken habenn. Fraget seinen namen. vnd vrsach seiner zůkůnfft.
Da er sich nůn genent hett. vnd des Lantgraůen fůrnemen angetzaigt.
vnnd alles was ym befoln war zůthůn. der Frawenn wol ertzelt.
erschrack sie vber ser, vnd schicket nach ÿrem schencken. vnd fraget
yn vmb rath. vnnd er rÿet ÿr heimlich hinweg zůfliehen. Also
hies er ein betagt weÿb das mit der frůmmen Fůrstÿn in důringn kummen
was. ÿr beste claÿnat. claÿder. vnnd was sie geschmeids hett. mit
dem bereÿtn geldt. einbinden. Dasselb alles mit zůnemen. Vnd als
sie ÿr sachenn alle nach ÿrem gefallen. bestelt het. wolt sie
ÿre kinder die noch in der wigen lagenn gesegen. vnd gieng
heimlich In das gemalt haws die zeit an dem Tůrn da sie beÿ den
ammen lagenn. vnnd bewegt aůs můtterlicher naigůng vnd grossem
betrůbnÿs redt sie also zů ÿrenn vnmůndigen kindern.

Wolt Got mein liebe kinder das ÿr der Jhar vnd vernůnfft wert.
das yr mocht erkennen vnd versteen ewer aller betrůbstn můter
anlign Vnd vnglůck. Anzweiůel ich wolt eůch weckn.
ein mitleiden mit mir zůhaben. Aber mein můterlich gemůth leÿd
nicht eůch an ewer rwe zůhindern. vnd den schlaff zůbenemen. Ich
hab aůch nit zeit nach fůg vber eůch meÿn laÿdt. gnůgsam zůbeweÿnenn.
Daran mich der schalckhafftigst Eebrecher behindert. Darůmb wil ich ÿm
weichen der mich vonn eůch absůndert. Vnnd ich bekenn es. Ich
wolt lieber sterbenn. Dann von eůch mich wenden. Wenn ich nit
zůforchtn hett. das er den Eebrůch mit dem totschlag ÿm selbst
zů verderbnÿss wůrd vermischn vnd mern. Aber wolt Got das er nach
meÿnem abscheidt nicht wider eůch selbst. sein kinder vnd aÿgen
blůt vnd fleÿsch den vnwillen wendet. vnd mich in frembden landen
derhalben důrch hertzen laidt totet. Mit disen worten kusset sie ÿre kinder
vil vnnd lang. Vnd also das sie entlich důrch gros betrůbnÿs
amechtig wart. Aber kůrtz von den ÿrnn erqwickt, gelabt vnd wider
auffgehabenn. Vnd Sprach also. Mein liebe kinder vergan mir der
Almechtig verlengerůng meines lebens. So wil ich machen das ÿr
nÿmmer mer solt vergessen. der grawsamen vnbarmhertzickait vnd
vertreibůng ewer betrůbten můter. vnd erfarn ÿr grosse lieb vnd
forcht, Vnnd mit diesem ergreiff sie Lanntgraff Fridrich Irn
eldisten Sůn. der vnter dreÿenn Iarn war. Dem sie mit einem Bÿss
gar schier aÿnen gantzen backen abbeÿs. Etlich sagen das sie hab
gesprochenn. Ich můs mein kinder zeichen aůff das sie die zeit ÿres
lebens an den schmertzlichen abscheidt ÿrer můter gedencken. Als sie nůn
die andern aůch vermeint zůbeÿssen. weret ÿr das der Schenck. vmb des
geschreÿes willenn.