Also wart die tůgentreiche Fůrstÿn an ainem strick von dem Schenckn
aůs der Ritterhaws zů Wartpůrg hinab gelassenn mit einer Jůnckfraw
vnd einem alten weib. vnd mit benantem knecht. vnd gieng in derselben
nacht gein kreÿgenberg. Da sie vonn dem Amptman des Apts zů Hirsfeldt.
wirdiglich angenůmmen. aůff einem wagenn gein Fůlda beleÿt wart. Da
sie mit grossenn eren von dem Apt entpfangn vnd wirdiglich gehaltn
wart. Vnnd gar herlich gein Franckfůrt bestelt. zůfhůren. Da sie
von den Bůrgern Der Stat erlich wart entpfangn vnd gehalten Vnd mit
allem das ÿr dienlich ader not was loblich versehenn. Vmb
das sie dess Romischen kaÿser Fridrichs des andernn tochter
was. Vnd als sie zweÿ Jhar daselbst Inn besůndererr keůscheit vnd
andacht het verendt. alleweg gnůgsam versorget mit allen sachen von
der Stat starb sie aůs grossem betrůbnÿs vnd laÿdt. vnnd wart daselbst
In Sannt katherÿn Closter begrabenn.