Da nůn Lantgraff Albrecht erfůr das sein Fraw hinweg was kůmmen wart
er sich ser betrůbenn. vnd mocht sein boshait in vil grosser arges
gewendt haben. wenn er důrch bos eingeben nicht aůff ein andere maÿnůng
wer geweiset wordenn. Darůmb beschůldigt er sein Erbars weib es
wer ein Eebrecherin. vnd wer aůs forcht er mocht sie darůmb straffen
lassen daůon geflohenn Aber der gůt herr bedacht nicht. das kaÿnn
mensch den Almechtigen mag betriegenn. Der aůch geredt hat.
Wee disem vonn welchem ergernÿs erwechst Wann Got
verlest die straff der Sůnder nÿmmer mer an rechtfertigůng der
Bůss Wiewol er zů weiln ein gedůldig mitleidenn vnnd
verweÿlůng hat.