Als die Lanntgrefÿn vonn Wartbůrg in der nacht kůmmen was. da
wart zůstůndt aůff den morgen frw von den ÿrn ein reÿtender bot.
zů dem Marggraff Ditzman ader Dittrich. in das OsterLandt zů Landsberg
gesandt. ÿm dise geschicht zůoffenbarn. Nachdem er nůn In
besorgůng was. sein brůder Lantgraff Albrecht mocht sein kinderr
aůch fůrnemen zůtoten. wie er seiner frawenn willens war gewest.
zůthůn. wenn sie nicht daůon kůmmen wer. kam er zů seinem brůder
gein Wartbůrg vnnd stellet. sich dermassen also wůst er nicht von der
sachenn. Sůndern das er sein brůder wolt trostenn. vnd mit gůnst
seines brůder die kinder mit ÿm heÿm nemenn. Darůmb
redt er dise maÿnůng mit seinem brůder. Mein lieber Brůder, Ich
hab von andern Lewthen erfarnn das dein weib wider dich gehandelt hat.