Schon Kůngůndt vonn Eÿsennberck. Vnd gewan ainen Sůn
mit ÿr. Den er lies Albrecht nennenn. Vnd den das gemeÿn Folck Apetz
nennet. Vnnd het sie vberswencklich lieb Dieweil er ÿr aber vor seinem
brůder kaÿn gůt dorfft eingeben. Versetzt er dem Lanntgraff Hainrich von
hessenn Weÿssensehe vmb Sechshůndert marck silbers aůff einen ernanten
tag wider abzůlosenn. Dasselbig gab er seiner zůhelderÿn vnd ÿrem Sůn.
Da aber der Lanntgraff vonn Důringen die zeit der bezalůng an entrichtůng
vbergieng. wart der Lanntgraff vonn hessenn bewegt. vnd hielts
dafůr es geschee von Lantgraff Albrecht aůs verachtůng. Beůor weÿl
das eÿnkůmmen der gedachten Stat. etwas fast gering war. Derhalben
er dem Ambtman derselbenn Stat. Willikÿn befalh Lanntgraff Albrecht
zůbeschedigen. Daraůff der Ambtman nach antzaige seines
herrenn gemůts ains nachts mit seinen bewanten zů Reÿnhartsbornn
einfiell. Wiewol er den můnchen kaÿn schaden theth.
Sůndernn die hůndert pferdt die Lanntgraff Albrecht die zeit beÿ seiner
zůhelterÿn zů Tenenberg ligendt. dahin verordent hett. hinweg treib.
Das verdros den Adell, vnd ÿderman saget. man solt den feinden
nachfolgen. den rawb abzůJagenn. Aber der Lanntgraff hett gnůg
an seinem balck, vnd setzt den aller tůgent vnd klůckheit
fůr. Aůch eben als achtet er disen schadenn gar nichts gab er
diese schmeelich antworth. Ach den thoren vnnd grossen narren.
das sie ein solch gros vnd weÿt. Landt vor ÿn habend, vnd ein
solchen geringen schaden gethan haben. Sie můssen eůch ein grossern
schadenn zůwenden. wenn sie mich wellen aůs meÿnem nest
hebenn. Von dises worts wegen wart ÿm all sein Adell ser gram
Vnd wider. Aůch zům tail das er vnbenůgig seinem weÿb. vnd aÿgenn
kindern das ergst zůertzaigen aůch seinenn vnterthanenn vbell zůthůn
vermeÿnet. Darůmb beschlos die Lanntschafft zů Důringen von ÿrem
aigen gelt vnnd vermůgenn Weÿssensehe wider abzůlosenn. vnd dem
Lantgraůen von hessenn sein geldt zůentrichten. ÿn vnnd ÿrn nachkommen
damit gůten frid zůschaffenn. Vnd das sie an besorgůng merers
schadens mochtenn lebenn.