Jnn mitler zeit vnnd nachdem Jhemmerlichen abscheÿdt gedachter tůgentreichn
Lanntgrefÿn. starb der Erst Lanntgraff Hainrich aůs den Marggraůen zů
Meÿssenn. welcher nach der tailůng seiner Lanndt vnter sein Sůn pleissen
vnd Aldenbůrg Innen Hett. da er aůch starb. Vnd nachdem ÿm ser wider was. dÿ
zwÿtracht vnd vnaÿnickait seines Sůns Lantgrafen Albrechts. in Důringn
mit seinen kindernn. gab er desselben seinen Sůns Sůnn. Hainrich
den er aůffgetzogen hett. das Lanndt Pleÿssen, als sein můterlich Erb
zůbesitzen. Welchs seinem vater ser entgegen wass.
aůs grossem Veterlichen widerwillenn gegen seinen Sůnen. Derhalben
dem Lantgraůen sein aÿgen brůder. vnd gar schier der maist tail vom
Adell ganntz gram wart. Aber solchs alles. aůch nachfolgendt vorclaÿnůng,
vnnd schaden der Sele vnnd Eren. vnangesehen. blÿb er in seiner verstocktn