des aldenn Lantgraüenn gefangn. Welchenn die zwen Jůngen herren
zů Slatheÿm gefencklich hieltenn. aůs ÿm yres Vaters heimlickait
zůerkůndenn. vnnd ÿn dadůrch aůff ein gůtiger maÿnůng gegenn ÿn
zůbewegenn.

Da aber nicht helffenn wolt. nam ym der elder Sůn Lantgrafen Albrechts
Lantgraff Fridrich der fraidig genant. fůr seins vaters Bastardt bey Tennenberg
fůrzuhalden. vnd ÿn vmb zůbringn. vnd er hett es aůch geendt. wann
ym das glůck nicht widerwertig wer gewest. Wann er vnnd ein
Graff vonn keffernberg seines Vaters Rath. stiessenn beÿ Weÿmar
aůffeinander. Vnnd weil er mit der antzal vnd sterck vonn ÿm bevortailt
was. wart er gefangen Vnd seinem Vater Lantgraff Albrecht zů Wartbůrg
geantwort, vnnd aůs geheÿs seines Vaters in aÿnenn thůrn gelegt.