vnd belaidůng ÿn vnnd sein brůder an alle redlich vrsach vermeint zůenterbenn.
Dennoch wart sein Sůn zů grosser erbarmůng gegen ÿm vnnd mit vil weÿnen
beweget. Wiewol er zůbesorgenn hett. Wenn er ÿn wider ledig geb. er wůrd
ÿm vil mer laids vnnd vbels dann vormals ertzaigen. Aber wie dem.
So lies der frům Jůngling die vernůfft walden. vnd gab ÿn ledig aůff
vorbit vnnd anregen seines Vettern des Marggraůen Fridrichs Tewte von
Lantsberg. vnd nam den aÿdt vonn ÿm. Also Sprechendt. Mir ist schwer
eůch als meinen Vater gefencklich zůhalden. das ir doch vmb mich wol
verdint habt. So ich aber bedenck veterlich lieb vnd kyntliche trew.
Aůch die gebot Gotes die Eldern zůlieben vnd zůeren. mag ich ewer betrůbnÿs
nicht gesehen. Deshalb ich eůch freÿ Stat gib hinweg zůkůmmen
wohin eůch geliebt, vnd lies ÿn also gar erlichen von den seinen bis
gein Freÿbůrg belaiten. Daselbst wart er von den seinen die seiner
ankůnfft warteten mit grossen fraiden angenůmmen. Aber den vorigen
vngnedigen widerwillen gegen seinen Sůnen legt er nicht allein nit hin.
Sůndern aůch denselbn wiewol wider bescheen aÿdt ÿe lenger vnd mer
stercket.

Nach cristi gebůrt zwelffhůndert vnd Im Sechsvnndachtigstenn Jhar
kam der Romisch konig Rudolff der gebůrt ein Graff vonn Habsbůrg
In Důringn vnd als er den grawsamen vnfrid zwischen Lantgraůen
Albrecht zů Důringn. vnd seinen Sůnen erfůr, fordert er baide tail