Herrenn. vnnd ÿren getrawen vnnd gůnstigen zůvben. Vnd nachdem
er vonn Tennenberg nit fern gein Reinharts brunn hett. Welches
Closterherrenn ÿm etwas nicht allerding zůgefallen lebtn. vmb das
nam er aůch fůr dasselbig sůnderlich vor andern zúbeschedigenn.
zcog aůs in solchem namen. Vnnd treib dem Colster [lies: Closter] zů Reinhartsbrůn
alles vÿh hinweg aůs allenn seÿnen dorffernn. Aber so baldt das
geschreÿ in das Closter kam, sammelten sich die Laÿenbrůder mit
sambt Iren Lewten vnd anderm Folck. vnd tribenn dem vnechtigenn
Lantgraff den rawb ab. Sie verwůndten aůch desselbenn Lewth vil.
Der vnechtig Lanntgraff wer aůch von aÿnem Laÿenbrůder mit eÿner
eÿsern gabeln důrchstochenn. wenn nicht etliche solchs gewert
hetten. Also zcog der Bastardt zů seinem Vater. Vnd claget ÿm solchs.
Daůon der alt Lanntgraff beweget wart. Vnd befalh herr Hainrich vonn
Mÿla Ritter. hawbtman zů Gotha. das er aůffs stercksts so er
vermocht aůff wer. Vnnd dem Closter zů Reinhartsbornn das Vÿh
gar weg treib. Aber Nachdem Derselb Ambtman ein Sůn Im Closterr
hett. warnet er eÿleÿndt den Apt daselbst. Derhalbenn der
Apt zůstůndt verschafft seiner armen Lewth Vÿh. an wol bewarte,
vnnd sichere Stete zůflohenn. vnd zůtreÿbenn. Damit die seinenn
nicht ser beschedigt wůrden. Da nůn benanter Ritter vonn Mÿla.
kam. fandt er kaÿn Vÿh aůff dem feldt. dem Closter zů Reÿnhartsborn
zůgehorig. Vnd můst ledig wider heÿm zciehen. Welchs dem alden
Lantgraůen ser zcornn thet. Vnnd als er sah vnnd merckt das sein
Bastardt aůff dem Sloss Tennenberg kain glůck hett. gab er es dem
gedachten vonn Mÿla ein mit disem beschaidt das er Jerlich daůon
zweintzig marck sÿlbers seinem bastardt gebenn solt. Da solchs Apt
Marqůardt vonn Reÿnhartsborn erfůr er bot [lies: erbot] er sich dem Lantgraůen
dreÿssick marck Silbers Jherlich zůgeben. sein Closter allenthalbenn
vor schaden zúbewarn. Welchs aůch der Lantgraff annam. Darůmb
nam der Apt dasselb Sloss ein. zú seiner selbst aÿgen. vnnd seiner
vntersassenn bewarůng. Vnd ist gescheen nach Cristi gebůrt
zwelffhůndert vnd Im Neůntzigsten Jhar. Damit wart der krieg zwischen
dem Lantgraůen vnnd dem Apt zů Reÿnhartsbornn hingelegt vnnd
gentzlich aůffgehaben. Welcher Lang gestanden was. Vnd baiden
tailn zů grossem schadenn vnd nachtail kůmmen was. Daraůs aůch
vil merers vbels mocht ersprossen sein wen solcher zwÿtracht nit
hingenůmmen wer. Wann als Lanntgraff Albrecht seinem bastardt
das Sloss Tennenberg vnd das ganntz gericht darzů gehorig hett gegeben.
Nach Cristi gebůrt zwelffhůndert vnd Im Achtvnndachtzigstenn Jhar Daůon
er aůch wartt herr zů Tennenberg genant. můst er darnach
aůff das vrtail der Romischen koniglichn Maiestat rawmenn.
Darůmb versetzt der Lantgraff Tennenberg dem von Mÿla wie oben gemelt ist.