solchs wider ÿrn willenn nicht getrawetn zůbehalten. Darůmb
zcog Lanntgraff Albrecht. an Reÿn zů dem Romischenn Konig
Adolff. vnnd clagt vber sein Sůne. Als soltn sie ÿm vil gewalts vnd
vnkintlicher belaidůng ertzaigt. Sůnderlich das sein Sůn. Hainrich das
Osterlandt ader Pleÿssen Im scheÿn der mitgifft mit seiner Frawen
vmb Fůnfftawsent marck silbers vom Romischenn kaÿser Fridrich
dem andern erlangt hett. Auch hettenn sein andere zwen Sune Fridrich
vnd Tÿtzman ÿn der dreÿenn Marck. Osterlandt. Meÿssenn vnnd
Lawsatz berawbt. Derhalbenn hett er ÿm seins bedůnckens nicht
vnbillich fůrgenůmmen sein vngehorsame Sůn von wegen solcher vntrew
zuenterben. Daraůff bater aůch disen Romischn konig das Landt zů
Důringn vmb zwelfftawsent marck lotigs silbers zukauffen vnd Pleissen
als dem Romischn Raich heimgefallen zůfordern vnd einzůnemenn.
mit angeheffter erbietůng er wolt ÿm alle sein gerechtickait daran gern
vbergeben. Auff das er alleine sein Sůne dester besser mocht straffenn.
Ader aber sie gar vertreÿbenn. vnd ÿm nach seinem wolgefallenn.
vnd so er gernn wolt etwas widergebe. ader ein geldt dafůr. Das er
ÿm allein Wartpůrg die tag seines lebens lies Innen haben. Daraůff
der Romisch konig an alle betrachtůng vnbedechtig wider der kinder willn
vnd gefalln Důringn yrem Vater vmb gedachte summa silbers bezalt. Vnd
Pleÿssen einfordert. vnd nachdem benanter Graff Adolff vnůerdint
Romischer konig erwelt was. bevlÿs er sich seinem grossenn geÿtz stat
vnd lůst zůgebenn. Vnnd nÿmants zůůerschonenn. Wenn er allein
geldt vnnd gůt erlanget. Vnnd weÿl er solt
anndere Lewth vnnd das Romisch Raich regirnn. kůnt er sich
selbst nicht regirn.