nicht bis zů enndt seines lebens. Darůmb ist loblich vnnd billich dass
Fůrstenn vnnd herren frůmmen herrenn nachfolgen dann disem Romischn
konig. Welcher nach verherůng der herren am hartz In die Herschafft
der Graůen vonn Beichlingen vnnd Swartzbůrg. von Slatheÿm vnd von
Heldrůngenn růcket. vnd verhert dieselben nach heÿdnischer weÿs. mit
rawben. brennen. vnd aller vngůte. Also kam er in eÿn dorff des Graůen
von Bichlingn vnd als sein Lewth nÿmants darÿnnen fanden. dann ain
ainig alt weib. Dem zcogenn sie all ÿr claÿder aůs. vnd beschmirten es
vberal mit wagenschmer. rÿssenn eÿn beth aůff, vnd welgertn es in den
federnn bis sie daůon als rawch als ein Ber wart. Bůnden es darnach an
eÿn seÿl. vnd fůrtn es allenn frůmmen Frawen zů schmah vnd hon. vor
dem konig in dem heer. vnd trÿben es solang bis sie nÿmmer vermůgens war
nachzůfolgen. Da liessen sie es ligenn. Also richtet es sich wider
aůff vnd kam wider zůbekantenn Lewthenn.

Der gleichenn schentlicher. sůndlicher vnd vnrůmlicher that vbt der Romisch
Konig Adolff an gedachtn enden vil. Nemlich da er die dorffer so gar