Da nůn die Stat Schidingenn in gůtem frid war. gieng ein Jůngling
mit einem habicht an die vnstrat peÿssen. vnnd als er ÿn hett aůff
ain antfogel lassen fligen. fieng ÿn ein Sachss aůff der andern seÿten
des wassers aůff. Als sich nůn der Sachs den fogell widert widerzůgeben
Sprach der Důring. Las fligenn den fogel. So wil ich dir ein heÿmlickait
sagenn die dir. vnd allen deinen gesellenn wirt nůtz sein. Daraůff
der Sachs sagt. So sag her begerstů des Fogels. vnd der Důring
sprach. die konig habenn ein frid zwischen eÿnander gemacht. Vnd
sein eins wordenn. wenn ir morgenn In der Wagenbůrg gefůnden werdt.