dem Cristlichen glawben entgegenn. Da anntwort der konig er wůste
nichts daůon. Dess Folcks wer vil vnd kunt ym nicht gestewrn. Also
verbot er solchs hinfůr vnnd lies daraůff warten. Daraůff
zehenn wůrdenn begriffenn Inn eÿner kirchen. Also lies der Romisch konig
sie alle greiffen. vnnd eÿnem yeden sein rechte handt abhawenn. Damit
liessenn sie darnach die kirchenn mit frid. vnnd namen solch grawsam
schalckhait vnnd vnthat nicht mer fůr.

Als nůn des Romischenn konig Adolffs Folck in der nehe nichts mer wider
fůttrůng nach annder lifferůng hett. můst es weÿter darnach ziehenn.
Nachdem aber die Jůnge Marggraůen vonn Meÿssen. den Graůen vnd herren
Inn Důringn. raisick Folck hetten zůgeschickt dasselb stewret vnnd weret
des konigs Folck trewlichenn. Vnd wo dieselben die kongische antraffen.
schlůgenn sie zuweiln aůch grosser antzal zů toth. vnd brachtn die kongische
Inn aÿn solche forcht das zweintzig. Dreÿssig Fůnffzig. vnd zůzeitn aůch hůndert nicht,
sich důrfftn aůswagen fůttrůng ader annder nottůrfft zůsůchenn.