Also woltenn die kongische ein mal vnter Raspenberg ÿrn můtwillen vben
mit rawben vnd anderm vbell. fieln in die dorffer vnnd Inn das Closterr
Das sie aůch vermeintn zůschendenn. Also das erfůren die Meÿsner aůff
Raspenberg ligendt, enboten sie das, den von Beichlingn gein Sachssenbůrg
gein heldrůng vnnd annders wohin vnd růckten zůsammen. das sie den
kongischen starck gnůg warnn. Vnd fieln zů den kongischenn In das Closter ein
slůgen vnd fiengn sie. vnd erfůnden aůs Jhemmerlicher clage das die vnselige
hůndt die hailige Gots vertrawete Junckfraw wider got. die welt. alle
zůcht vnnd Ere notgetzůchtigt vnnd geschandt hettenn. Also warn die Herren
vnd Erbarnn Lewthe mit solchem zornn bewegt. das sie die gefangenn all
woltenn erslagenn. Aber ein frůmmer Ritter gab diesen Rath. Dÿweil sie
die frůmme kinder vnnd Colster [lies: Closter] Iůnckfraw hetten so Jhemmerlich gelestert. Das
man solt alle vnedle die dabeÿ gewesen wern toten. vnd die Edlen wider
schenden. Nemlich das man solt ÿn allen aůsschneiden. die claider aůsziehn bis
aůff ein hembde. die hende aůff den Růck binden. die Nÿrn an den hals
hengen. Vnnd also gebůnden vnnd nacket dem konig vngeschatzt wider heÿm
schickenn. Wie aůch geschah.

Solch schmeůng gieng dem Romischnn konig ser zůHertznn. vnd schembt sich wunder ser