Inbesorgůng sein koniglicher nam wůrd verclaÿnt vnnd gemÿndert dadůrch. Auch
beforcht er wenn der gleichen mer vonn seinem Folck beschee
es mocht ÿm aůch dermassen schmeůng wider ertzaigt werdenn. Vnnd
hies das heer auffbrechenn vor Mittelhawsenn Vnd zcog gein Můlhawsen vnd
lag daselbst. Da aber das kongisch Folck den Bůrgernn
zů Můlhawsen vil verdrÿs. vnnd vber vilfaltigs clagen die teter vngestrafft
blÿbenn. wůrden die vonn Můlhawsen bewegt. vnnd sammeltn sich ain mal
nach antzaigůng der stůrmglockenn. vnd Iageten den Romischn konig vnd
sein Folck aůs der Stat. Vnnd nach dem sich die kongische zů der gegenwer
steltenn blÿben baider saits vil Lewth tot Aůch kam der Romisch konig kaůmet
daůon. Derhalbenn besorget der konig er mocht ein spot werdenn aller vnnd
beůor der gnantn Landt, vnnd zcog eÿlendt aůs dem Landt. Kůrtz
darnach wůrden Lÿd von dem konig vnnd seinem Folck gemacht, gesůngen
vnnd angeslagenn. Vnd vnter andernn aůch nachfolgende reÿmenn.
Die Edeln von dem Reÿn. Die rieten zů dem weÿn. Vnd kamenn vnter
Raspenberg. Des konigs hoffgesindt. Begreiff Gottes kindt. Vnd trÿb gar
schemliche werck. Got mocht das nicht erleyden. Jr Beůttel lies er schneiden.
Das warn gar lesterliche mer. Sie haben nach meynem bedůncken, Ir
heller daselbst vertrůnckn. Das ÿn die seckel wůrden ler. Da sie zů haws kamen.
Vnd ÿr Frawen vernamen. Wie das ir heller warn verlorn. Vbel warnn sie
enpfangn. Vil besser wer gehangn. Dann leÿden solchnn schmah vnd zcorn.

Nit Lang darnach sammelt der Romisch konig Adolff ein New heer. vnd zcog aůs die