Jůnge Fůrstn Lantgraůen Albrecht Sůn in dem OsterLandt zůkriegn. vnnd
zůůersůchen ab er daselbst mer Sÿgs dann in Důringn mocht erlangenn Wann
er merckt wol das die Důringn eer gůtlos dann erlos werden wolten. Legert
sich vor Freibůrg. vnnd verterbet alles das an der Sal was. vnnd thet
grossen schaden vnd gewan das Stetlen Freibůrg. Daselbst
leget der konig mit zweÿen bůrgern weÿs vnnd weg an. die Stat Naůmbůrg aůch
zugewÿnnen. Also gewan er das Slos zů Naumbůrg. vnd schlůg tot was
er vonn lewten da fandt, sie warn Edel ader vnedel. Sie toten aůch zů
Freÿbůrg alles werhafftigs Folck. Wann der konig besorgt er mocht wider von
ÿn verraten werden. Vnnd die kÿnder vnnd Frawen weiset er aůs. Darnach nam
er rath wie er das Sloss zů Naůmbůrg besetzn solt. Daraůff wart ÿm geraten.
das Slos wer weÿt vnnd gross. vnd must vil lewth daraůf lassenn. vnd vil
kost daraůf bestellen. vnd mocht es doch die lenge nicht behalden. vor den Jungn
herren von Meyssen etc. Er hets aůch fern vnd schwerlich zůspeÿsenn. dann
es wer aůch in der Iůngn hernn Landt gelegen. Darůmb solt man es zůbrechn
vnd verstorn. vnd das Stetlen verbrennen. vnd verwůstn. Also thet aůch
diser konig. vnnd zcog wider hindersich an den Reÿn.

Kůrtz darnach baweten Marggraff Fridrich zů Meÿssen vnd darnach
Lantgraff zů Důringn vnd Tÿtzman sein brůder Marggraff zů Landsbergk