vnnd Im OsterLandt Naůmbůrg wider, aůfs best So sie mochten. vnd
besetztenn das mit gůter manschafft, vnd besteltn es mit speÿs vnnd
geschůtz. Trostenn aůch die Graůen, Erbarnn lewth. vnd etliche
Stete in Důringn wol. vnd baten sie da sie vest woltenn halden. Wann sie
woltenn wider beÿ ÿn Ir leib. Ere. vnnd gůth setzen. Vnnddes nÿmmer
gegenn ÿn vergessen. in allen gnadenn zůerkennen.

Nach Cristi gebůrt zwelffhůndert vnnd Im Fůnffvndneůntzigsten Jhar kam
konig Adolff wider vonn dem Reÿn mit eÿnem grossenn heer in Důringn. vmb
Gotha Sůnneborn, vnnd Erffa. vnd verhert aůch die gegent vor dem walt, vnd
verderbt was er fandt. vnd verbrant den Erbarn ÿr dorffer. die ÿm aůs
des Lantgraůen Albrechts nicht wolten hůlden. zcog aůch vber walt
auff die herren vonn Franckensteÿn. Welche es aůch hielden mit den
Jůngn herren wider den alden Lanntgraůen. Also legt er sich mit
sambt seinem Folck an die Werra. vor Franckensteÿn vnnd vor Saltzůngn. Thet da vil,