Die lewth aůff der bůrg Crewtzbůrg liedenn grossen důrst. Vnnd
hettenn korns vnnd mels gnůg. Aber des wassers grossenn gebrůch.
Wann die Cisternn aůff dem Slos was verfawlt. vnd musten das wasser
des nachts stelen. vnd sich aůs den fenstern mit seÿln lassenn.
brůnnen zůholnn. Als sie das eÿn weÿl tetenn. da warn es die in dem
heer gewar. Mit welchen sie ein geding machtn solchs zůschweigenn.
zům letztn wart es vor den konig gebracht. der lies sie darůmb straffn.
das sie gelt hettenn genůmmen vnd das geschwÿgen. vnnd setzt tag
vnnd nacht sein hůt. das sie kaÿn wasser gehabenn mochtenn. Die
kongischn die in der Stat lagen. hetten ain hawbtman gnant von
Brawbůrg Derselb lies ein katzem machen vnd ein werck. vnd das
trÿben an den Bůrckberg. vnd hett stets da vil Weppener vnd
schůtzen Inn Vnnd vermeint die Bůrckmawrnn daraůs zůvnntergraben.