Ains ser heissenn tags musten vil wepener vor grosser hitz in ein keller
weichenn. Dess wordenn die aůff der Bůrg Innen. lieffen aůff die
die da noch in dem werck warnn Erslůgenn die vnd brachtenn Fewr
Dareÿn vnnd verbrantn es.

Als sie aber aůff der Bůrck solchen grossen gebrechen wassers hetten
Das sie mit Bÿer kochtenn. vnnd brot bůchen Vnd sahen das sie dess
nicht Lang kunten gehertn. Wann des Folcks aůs der Stat war vil zů
ÿn kůmmen. die ÿr hab mit ÿn hinauff gebracht hettenn. Dingtn
sie leib vnd gůt aůs gegen dem konig vnd hůldetn ÿm. Also zcog er ab.
Vnd die bůrger bawetn wider an der Stat. vnd behilten ÿr geflochint gůt

Darnach zog der Romisch konig wider heÿm an den Reÿn vnd setzt
den vonn Brawberg zů ainem hewbtman In Důringn. vnd schicket
ÿm Folck zů Die Graůen vnd andere seine widerwertige In důringn
zůstillen vnd zůbeschedigen. Aůch die Stete vonn ÿm eingenůmmen
zůbeschůtzn. Dermassenn teten die Iůngen Fůrsten von Meÿssen
aůch. vnnd legtenn aůff ÿr Slosser aůch Lewth. Darůon ein schneller
Reÿtender krieg wart. zwischen den kongischenn vnnd Landtlewthn.
Der konig het Innen Eysennach Crewtzbůrg vnd Gotha. Da lag der vonn
Brawberg mit vil Folcks. Die Jůnge herrnn von Meyssen hettn Innen