Weÿssensehe vnnd Sangerhawsenn. DarInnen ÿr Vogte lagenn. Welchn die Graůenn
vnd Erbarn lewth darůmb gelegn vnd wonhafftig halffen. Derhalben begab
sich Nach Cristi gebůrt zwelffhůndert vnnd Im SechsvndNeůntzigstn Jhar
am Sontag Inn mitfasten das des konigs. vnd der Jůngen Fůrstn Vogte
aůffeÿnander stiessenn vnůersehn beÿ dem dorff Eschenber. mit zweÿen
grossenn hawffen. Wiewol des konigs Folck vil sterckerwas. dann
der Iůngen Fůrstn. Doch woltn sie da lieber mit den feinden streitn. dann
schentlichen flihn. Also streÿten sie baider saits gar hertiglichn
ein lange weil. vnnd also. das sich der Jůngen Fůrsten Lewth. berait
ergebenn hetten. vnd kůnten von wegenn grosser můdickait wenig were thůn.
Aber Solchs wůrdenn die Erbarn Innen důrch antzaigůng eines Pawrn
der von dem Acker entflohen was. Derhalben der vonn Wangenheÿm vnd
der vonn Erffa man zůrantn zůůersůchen. ab sie der Iůngen herrenn
Folck eÿn hůlff mochtn ertzaign. da dis die kongische gewar worden
flohen sie darůon. Vnd der Jůngn herren Folck kam wider zůsammen.

Da nůn des Romischn konigs Folck schentlichn geflohen was wůrdenn der Jůngn
Fůrstn Lewth hertzenhafftiger vnnd můtiger. vnd traffen zům andern mal.