So solt ir alle gefangenn oder erslagen werden. Dess der Sachs lacht.
vnnd sagt. du schimpffst. Des andern tags Sagt der Důring. Wir
bewern das ich nichts Im schimpff geredt hab. Darůmb wirt eůch
die flůcht das best sein. Darauff der Sachs den Fogell lies fligen.
Vnnd eÿlet zů den seinen. vnd offenbart ÿn was er gehort hett. Vnd nachdem
der Sachssenn wenig. vnd der maist tail erslagenn vnd verwůndt was.
wůstenn sie Inn eÿl nicht was sie thůn soltenn. Nůn was die
zeit ein alter Ritter vnter den Sechssischen Fůrsten. hartwigato
genant. der zcog an sein harnasch vnnd ergreÿff das koniglich Baner.
das beÿ den Sachssen haÿlig was gehaltenn. bezeichent. mit eÿnem
Lewenn, einem trachen. vnd darůber mit einem flienden Adler. das
do bedewtet stercke. vorsichtickait. vnd die hohe der mechtigkait vnd
vernůfft mit bestendickait ÿn angeborn sein. Vnd als er solch
Baner gefast hett. machet er ein still vnd redt also. O
ir allerlibstenn brůder vnd mit Ritter. Ich hab gelebt vnter den
aller besten Sachssen bis itzt. auff mein letzte tag. der ich nÿe hab
sehenn flihen. oder den Fůs verwenden. Wie werd ich nůn bezwůngen. zůthůn
das ich nÿe gelernt hab. Wil vnns das glůck nicht lenger
lassen leben. wo ist besser sterbenn dann beÿ den freůnden. Last eůch
die Veterlichenn redlickait vnnd tůgent Vnnd die toten Corper ewer freůndt
hie beÿ eůch verstrawet. ein exempel sein. Die da lieber habenn wollen
sterbenn. Dann vberwůnden werden. die sel verlassenn dann fliehen.
Darůmb folget mir nach ÿr aůssennleser Ritterr. So wollenn wir dise
nacht die feÿndt Im schlaff vberfallenn. Ab wir nit gesÿgenn.
wil ich eůch disenn meÿnenn grawen kopff abzůhawen vergůnnen. Von
diser rede wůrdenn die Sachssenn gesterckt. vnd beÿ dem ersten schlaff
stigenn sie mit gewapenter handt aůff die Maůrn zů Schidingenn,
Vnnd als sie etlich wechter hinabgeworffenn hettenn. vnd gewůnnen die
Stat mit gewalt. Vnnd alles das manbar was erslúgen
sie, vnnd was nicht manbar was. behielten sie zů eÿgen. Vnnd
Weÿl die Sachssenn konig hermenfrid mit allem vleis sůchtenn.
kam er kaůmet mit seiner Frawenn. vnnd seinen kindern Vnnd
einem Ritter darůon.