aůch nicht mer Folcks schicket. Aůch keÿn geldt vber senden kůndt. soldener
zuerhaltn. Also bleÿb sein Důringischer krieg vnbestaldt So derst der Brawberg die
Stete mit soldener ader mit anderm nicht mer beschwernn. Also
gewanen die Jůngn Fůrstn. Freihait vnnd sicherhait sich zůberegen Vnd
vbertzogenn die kongische Graůen. Vnd die es aůch mit yrm Vater Lantgraff
Albrecht hilden. Als Nemlich die vonn keffernberg. die vonn Můlborg.
Vnd die von gleichn vnd gar schier alle herren vnd Edeln vor dem waldt.
vnd verderbtn ÿn Ir Herschafft vnd gericht zůgrůndt. Derhalben
aůch ÿr etliche wider von dem konig fieln. Beůor da sie mercktn
das es vnredlich mit dem konig zůgieng. vnd das er sein aigen Folck
selbst nit zuerlosen vermocht. vnd das sich die Edeln vom Reÿn selbst
můstn losen. Aůch wurden dem konig sein aigen freůndt am Reÿn. vmb seiner grossen
hoffart vnd ander vntůgent willen gram vnd vngůnstig. Derwegen sein gewalt
vnd Ere abnam.

Doch findt man das nachdem. der Romisch konig die schlacht beÿ Eschenber
verlorn hett. das er darnach mit eÿnem grossen heer in das Osterlandt
getzogen ist. Da er vonn Erst die Stat Begaw an all widerrede vnd gegenwer
des Abts einnam. Baldt darnach gewan er das Sloss Groÿsck.
darbeÿ gelegenn. vnd zů brach das grůntlichn. wie man noch sÿcht.