mit gleitsbrieůenn vnnd versicherůng zů ÿm zůkůmmen. Welchen er
glaůbet. vnd baldt mit wenig Folcks gein Aldenbůrg kam. Als aber die
kongische erfůrn das er kůmmen was. lieffen sie mit getzogener were
in sein herberig. Da er vber tisch sass. Da ÿn ainer vermeint zůmordn.
Diss sah ein Bůrger vonn Freiberg. Vnd sprang fůr seinenn herren.
Vnnd entpfing den slag dorůon. Vnd starb. Aber dem Lantgraůenn wart
vonn den seinen oben in das haws geholffenn. Da er beÿ der
nacht aůs kam. vnd der Feindt hent entgieng.

Nůn hort der Romisch konig Adolff wie das Berckwerg zů Freÿberg früchtbar
were. Daraůff Lantgraff Fridrich allenn seinen trost gesetzt hett.
Derhalbenn er ein Verretereÿ mit den Bůrgernn In der Stat machet.
Den er vil Freÿhait vnnd kaÿserlich Priůilegia verhies. Das sie ÿn
beÿ der nacht einliessen. vnd ÿm das Slos hůlffen gewÿnnen. Als
sie ÿm das verhiessen. wart er Inn aÿner nacht eingelassenn.