Eysennach. Welchem Closter sie bescheÿdt zů einem ewigenn selgeredt.
das dorff zů dem Langen haÿn. Das dieselben Closter Jůnckfrawenn noch
besitzen. Aůch wart dise Lanntgrefÿn ein grosse rewerÿn vor
dem endt yres lebens. vmb ÿr sůndt. Vnd wart da vor sant katherina
altar mitten in der kirchenn begraben. Vnd aůs geheÿs Lantgraůen
Albrechts herlichen begangn. Dar nach nam Im Lantgraff
Fridrich der fraidig Lantgraůen Albrechts Sůn fůr. benantem Closter
das gedacht dorff wider zů nemen. Vmb das sich seines Vater vngůnst
wider ÿn ganntz von der selben kůnnen von Eÿsenberg kůmmen was.
Vnd wolt darůmb ÿr sel geredt hindern. Welchs Got weret. Wann ÿm
widerfůr soůil vnglucks darůber das er den Jůnckfrawen das dorff
widergab Es geschah aůch Inn dem Closter vnnter messen von wegn
des gebets der Iůnckfrawenn das die brÿnnende lÿcht zů ÿn waltzentn.
Jn demselben Jhar starb aůch der gnantn lantgrefÿn Sůn lantgraf Apetz
den sie von Lantgraff Albrecht het. vnd wart aůff sein begerůng beÿ
seiner můter zů Sannt katherÿn begrabenn.

Nach abgang diser Frawen kůngůndt vonn Eysenberg gedacht Lantgraff Albrecht
an den alten hass. seiner Sůne. Vnd vermeint sie noch zůenterbn.