Da konig Dittrich solchs erfůr geredt er dem Ritter Iring gros gab.
wenn er konig hermenfrid mit weib vnnd kindern zů ÿm brecht. Vnnd
konig hermenfrid. ertothet. wie der Jring aůch annam. Als nůn
Iring den konig hermenfrid bracht. fielh er konig Dittrich
zů fůssenn, vmb gnad bittendt. mit manchfeltiger entschůldigůng
vnd das ÿm solchs vonn sein Rethenn geraten wer. Da dasIring hort.
der nebenn ÿm stůndt mit einem langen schwert. vnd sprach. du lewgst. vnd
erstach sein herrenn konig hermenfrid. Da das konig Dittrich sah. wart er
ser bewegt. vnnd sagt. vmb das dů deinen eygen herren erstochenn
hast. wirdestů billich vonn ÿderman gehast. Darůmb geben wir
dir ein offenn weg zůgehen. wo dich hin gelůst. Dann wir kůnnenn dein
boshait nit tragen. Daraůff Jring antwort. Billich werd ich vonn
aller welt gehast. weil ich deiner betriglickaÿt gepflogt hab.