Wartburg Inn einer nacht vnd verbarg sich selb zehenndt In einem
Loch In dem gehawen steÿn das noch des Lanntgraůenn Loch heÿst
vnnd ersteÿg Wartpůrg hinden beÿ der Cisternn. Vnd fieng seinen Vater
Welcher mitsambt seiner stiffmuter mit ÿm teÿdingt das er dem Sůn
des andernn tags Wartpůrg raůmeth. vnd zcog gegenn Erffůrt, vnd gab
den vonn Erffúrdt etlich dorfferr. Darůon sie ÿm selb zwelffte
die pfrůndt, dÿweil er lebt. gabenn.

Zůstůndt da die vonn Eysennach erfůrn das Wartpůrg verlorn was.
vnnd der Lantgraff geraůmet hett. erschracken sie ser. vnd zogen
so baldt mit des konigs Vogtenn fůr Wartpůrg. Vnnd hieben den
haÿn nieder. Also das nÿmants wider aůff nach ab mocht kůmmen.
Vnnd teten dem Romischenn konig zůstundt daůon botschafft, bedenckn
Daraůff was er Inn disem thůn wolt zůnemen.