Das er ÿn wider Got. Ere. recht vnnd Veterlich trew entpfrembdet hett. Er
wer aůch mit seinem brůder alleweg Inn vngetailtn gůtern gesessenn.
Wiewol der selb zů Landsberg, vnnd er zů Meÿssen wonhafftig gewest.
Darůmb hofft er das keÿner neher erb zů dem Landt wer dann er. Wolt aůch
solchs die Graůen. Herren. vnnd Ritter Inn Důringn lassen erkennenn.
Dann der Romisch konig Albrecht wer ÿm vngenaigt vnd deshalb verdechtig.
Inn mitler zeit gab vnnd gelobt Lanntgraff Fridrich den Vogtenn Im
OsterLanndt soůil das sie ÿm die Slosserr vberantwortnn.

Etliche Cronicka beschreiber schreibenn, wie das der Romisch konig Albrecht,
einmal gegen Fůlda. seÿ kůmmen. Dahin ain tag angesatzt. dem alden
Lantgraůen Albrecht. vnnd seinen Sůnen. Das er aůch den Lantgraůen
Albrecht ser hertiglichen hab gestrafft, vonn wegen manchfeltigerr
grawsamer vnnd vnveterlicher vngůte an seinem Erstenn weib, vnd an