Wenn er dann nichts het. So můst er vnterweiln solchen hůnger vnnd
kůmmer leÿdenn, das er kaůmet das drůckenn Brot. oder Aber die
rindenn zů essenn hett. Vnnd vil vnseliger dann sein knecht war. Die
sich beÿ den reichen bůrgern vmb die gůte pÿssen vnd Drůnck
vmbtethenn. Dÿweil ÿr herr nichts vberal hett.

Kůrtz darnach Nemlich nach Cristi gebůrt Dreÿzehenhůndert vnd Im
Fůnffzehenden Jhar. vnnd Im ViervnndSechtzigstn Jhar seines alters.
starb Lanntgraff Albrecht ein pfrůndner zů Erffúrdt. vnnd wart.
begrabenn zů vnnser lieben Frawen aůffm Berg Welcher kirchen
er ser vil gegeben vnnd geaÿgent hett. Wann er gar mild was kirchen
vnd Closternn zůgeben, nit vmb Gotes willen allein, Sůnder das er sein
Sun ermer mocht machen. Dann als er vber vilfaltigs boses fůrnemens.